Cuanto mas hortamento publico mester tin, prome cu pueblo lanta contra corupcion?

28 Maart 2017

Actualmente na Brazil, Rumania, Belarusa, Corea Sur y Rusia, tin un desaroyo positivo ta tumando luga. Na e paisnan aki, publicamente politiconan corupto ta wordo rechasa. Den weekend na Belarusa y na mas di 80 ciudad na Rusia, tabatin demostracionnan masal contra corupcion. E pueblonan aki a cansa di politiconan tradicional cu solamente ta enrikece nan mes riba custia di pueblo. E manifestantenan tambe a mustra nan disgusto contra periodistanan cu ta yuda gobierno controla y manipula tur  informacion, pa asina mantene e pueblo dom y bobo. Na e paisnan menciona, e pueblo a dicidi cu ta basta cu e hortamento y e enrikecimento personal di e clase politico y su grupito privilegia. E pueblonan aki no kier mira of tende storianan bunita mas. Nan sa precies kende ta esunnan cu a enrikece nan mes y asina hinca e pais den un abismo financiero. Pero mas importante, e pueblonan aki ta mustrando curashi y balentia. Nan no tin miedo mas pa persecucion, intimidacion of menasa di e politico tradicional. Nan sa cu ta e pueblo tin e poder y no e politico tradicional, su famia of su amigonan. Nan sa cu e corupcion na nan pais a sali for di man y nan ta exigi cu e politiconan tradicional corupto wordo investiga, persigui y cera, manera cualkier otro ciudadano.

 

Siman pasa, atrobe un avion a sali pa Hulanda, yena cu politiconan, campañadonan, sostenedonan, musiconan y periodistanan pa celebra Arubadag. Tur esaki bou di e pretexto pa 'informa pueblo' y pa asina mantene e ilusion bibo cu tur cos ta bon. Un triki politico bieu y gasta pa campaña cu placa di pueblo. Un forma pa laga algun sostenedo of campañado, cu supuestamente ta rabia, kere cu e biaha aki, e politico tradicional amigo no a lubid'e. Un otro manera pa recompensa algun fiel miembro di prensa y sostenedo. By the way, un aña a pasa y ainda pueblo no a tende di e ex-minister di Turismo cuanto e trip di Arubadag di aña pasa a costa. Ban wak si e aña aki, e periodista cu a exigi esaki, lo percura pa pueblo haya sa cuanto e trip di e aña aki a costa, manera e tambe tabata presente atrobe.

 

Na Corsou, nan por a cumpra tereno, construi un hospital full nobo, grandi, moderno y bon ekipa, pa 421 miyon florin! Aki na Aruba, un expansion lubidando e salanan di operacion, ta costa casi 1 biyon florin (pues e dobel). Lo reconstrui e caminda pa Sabana Blanco pa un suma di mas o menos 1 miyon pa kilometer, mientras pueblo tin cu paga mas di 30 miyon pa kilometer pa e ‘Caminda Scur’. Parlamentarionan a vota ‘VOOR’ pa e ‘CITGO-deal’, y asina REDOBLANDO E MEGADEBE (4 biyon florin), sin cu tin un garantia pa cuponan di trabou pa hendenan local. Loke si a wordo regla ta, trabou pa algun contratista liga na e minister, e garantia cu TNO lo haya 5 miyon dollar pa su ‘algenproject’ y cu un ‘RDA-Bank’ a wordo crea. Tampoco nos no por keda sin menciona e conciertonan miyonario, organisa pa ‘ATA-Bank’, e ‘WEB-Hedging’ di 300 miyon florin, e brug di Madushi, e asunto di e ‘Broedende Kip’, proyectonan manera ‘Plantation Bay’ y ‘Urbina Fuentes’, Fabela, ‘Lucht- en Zeebrieven’ of e Radar di nos aeropuerto.

 

Aki na Aruba, tur hende sa precies cua politico a bira miyonario riba lomba di pueblo. Campañanan miyonario ta wordo hiba, sin cu ta haci e pregunta di unda e fondonan ta bin. Anto cuanto mas hortamento publico mester tin, prome cu pueblo lanta contra corupcion?

Please reload