Na Aruba, e sistema electoral tambe ta ‘Rigged’. P’esey mester bin un cambio awor!

12 December 2016

Durante e ultimo eleccion Mericano, e presidente electo tabata keha di un sistema electoral ‘Rigged’. Pues cu e sistema electoral, cu a wordo diseña pa e partidonan tradicional, tabata antidemocratico y cu e tabata faborece solamente e politiconan tradicional. Asina e politiconan tradicional por a keda den e centro di poder pa un eternidad, unda nan por a sigui haci y deshaci na nan antoho, te e siguiente eleccion unda nan lo tira algun pinda pa pueblo atrobe y laga un parti di esaki kere cu esaki ta democracia. Aki na Aruba, nos sistema electoral tambe ta ‘Rigged’ y ta faborece solamente e politiconan tradicional (incluso e buladonan di cura cu awendia tambe ta miyonario). Ni cuanto show of campaña miyonario cu nan organisa, nan no por sconde e realidad amargo cu cada aña e debe nacional a sigui crece (hunto cu e grupito di politiconan tradicional cu a bira miyonario), casi tur nos patrimonio, autonomia y orguyo a wordo entrega/regala, e debatenan politico no tin nivel y ta poco contenido a wordo duna na e meta y vision di Status Aparte. Awendia Aruba ta mas dividi, mas pober, mas insigur y unda tin menos respet pa otro y nos balornan.

 

Esaki ta e cosecha di 30 aña di nos sistema electoral ‘Rigged’. E ta obvio cu si nos sigui cu e sistema aki, e lo no dura mucho tempo mas prome cu Status Aparte lo existi solamente den bukinan di historia. Nos no por laga esaki pasa y menos cu nos isla, nos cas, nos patrimonionan y nos futuro generacion, sigui wordo destrui y entrega/regala pa e politico tradicional. A bira tempo pa ‘Unrig’ e sistema electoral corupto aki, pa asina duna contenido y participacion real na un forma honesto na tur hende, manera tabata e intencion di Status Aparte. E siguiente puntonan lo aporta sigur na esaki y nan mester wordo regla prome cu eleccion 2017.

 

  • Introducion di e ley encuanto financiamento di partidonan politico;

  • Areglo husto pa subsidio igual pa tur partido politico cu ta participa na eleccion. Asina por limita dependencia di ‘Big Fishnan’;

  • Areglo husto di tempo di transmision (‘zendtijd’) na television y radio pa cada partido politico. Asina pueblo por haya mas informacion y e partidonan nobo cu no tin un propio medio di comunicacion por comunica cu pueblo sin cu nan ta wordo boicot;

  • Institui un Autoridad Electoral (cuerpo di arbitronan) cu ta supervisa e campaña electoral y cu poder di duna sanccion si ta necesario. Su tarea lo ta pa vigila conducta, comportacion etico etc.;

  • Haci limpi (‘opschonen) e rigistro di votadornan na Censo. Esaki pa evita fraude (pa hendenan cu no ta autorisa, por eherce e derecho di voto);

  • Crea e posibilidad pa sostene lista di partido politico (nobo), via e propio partido cu mester cumpli cu e rekisito di colecciona un cierto cantidad di firma pa por tuma parti na e eleccion. Esaki lo ta mas facil, practico y moderno enbes di pidi e cuidadano bay censo pa firma un lista. E ora ey e lista di firma solamente mester wordo controla;

  • Crea e posibilidad pa Arubianonan cu ta biba den exterior (cu pasaporte Hulandes) por vota den eleccion 2017.

 

Tur partido por expresa su amor pa Aruba, pero ningun partido por pretende di tin e monopolio pa sirbi y goberna Aruba. No ta un arte of algo excepcional pa malgasta placa di otro. Ta hopi facil pa politiconan tradicional core campaña cu placa di pueblo y bende pueblo mil y un fabula pa tapa nan incapacidad y enrikecimento personal. E debe biyonario y e entreguismo total, ta nan logronan y confirmacion cu e sistema electoral na Aruba tambe ta ‘Rigged’ y nunca e la sirbi pueblo su interes. P’esey mester bin un cambio awor!

Please reload