26 September 2016

Siman pasa, pueblo por a mira atrobe con gobierno a maltrata parlamento ora e la laga parlamentarionan ‘studia e CITGO-deal’ di 2000 pagina bou vigilancia. Si esaki tabata un incidente isola, ainda pueblo por tabatin un poco simpatia pa e accion di bay yora cerca gobernador, di algun parlamentarionan. Pero e falta di respet di parti di gobierno pa parlamento, ta structural.

Sin cu gobierno tabata tin autorisacion di parlamento, gobierno a viola e ley ‘Settlement Agreement y a regala ‘CITGO’ 9 miyon florin pa despues trata di bende pueblo cu e 10 miyon dollar cu ‘CITGO’ lo paga na impuesto ta un ‘salbacion’. Parlamento a keda sin atende gobierno riba e violacion di ley aki. Sin cu un dia gobierno a laga parlamento mira un documento, 13 mei 2016 tur fraccion den parlamento a felicita gobierno cu e ‘CITGO-deal’. Awor siman pasa parlamento a wordo ordena pa trata e ‘CITGO-deal’ di 2000 pagina, prome cu 1 october 2016. E orden a bin, pasobra gobierno mester di su cabay di campaña ‘mehorador’ pa laga un parti di e pueblo lubida bou kende su gobernacion e refineria a wordo cera y kende kier a desmantela e refineria. Tambe gobierno mester produci algun entrada ficticio pa cumpli cu e condicionnan impone pa CAft, pa asina evita di haya un otro ‘Koninklijk Besluit (KB)’. Algo similar gobierno a haci aña pasa, ora e la horta 60 miyon di SVB. Tampoco nos tin cu lubida e cobramento di e ‘finder’s fee’ miyonario pa e grupito selecta, cu ta splica e ansha pa bulldoze e ‘CITGO-deal’.

Riba e asunto di confidencialidad y e trato di mucha chikito di nos parlamentarionan, tin para den e  ‘Definitive Participation Agreement (Execution version), pues e ‘CITGO-deal’, seccion 20: ‘The obligations of each Party under this seccion 20 do not apply in the following circumstances: information required to be disclosed or retained by each other by Applicable Laws and jurisdiction, including any law..’

E seccion 20 di e ‘CITGO-deal’, ta mustra claramente cu nunca gobierno mester a trata parlamento manera un mucha chikito y tampoco su presidente mester a acepta cu parlamentarionan solamente por a ‘studia e CITGO-deal’ bou vigilancia. Parlamento no ta cay bou e responsabilidad di gobierno (cu si ta un ‘Party’), loke ta haci e asunto di confidencialidad nulo. Tambe e mesun seccion ta bisa cu e asunto di confidencialidad no ta conta den cuestionnan di ley. Trahamento di ley ta un di e tareanan principal di parlamento. Pues con e presidente di parlamento por a coopera cu e maltrato parlamentario aki, ta un otro muestra cu su agenda no ta esun di pueblo of e bienestar general.

Conclusion: 

E asunto di studia e ‘CITGO-deal’ bou vigilancia, ta un otro dia scur den nos historia democratico.