8 Augustus 2016

Antes un ladron tabata uza su cabes, e tabata horta den scuridad, e tabata bisti na preto, e tabata hiba locual e por a carga y e tabata uza un flashlight pa no wordo detecta. Awendia, e ladron no mester tin hopi inteligencia, e ta horta den dia cla, e ta bisti un dashi, e ta hiba tur locual tin y hasta e ta organisa full un show pa laga tur hende sa, cu e la caba di horta. Awor, nos sa cu e descripcion aki, lo pone algun hende hari, pero en realidad e ta hopi serio y tristo pa constata esaki. E ta bira ainda mas tristo si bo realisa cu tur hende sa esaki, pero ta prefera di consola su mes cu: ‘Pero kico bo kier pa nos haci? Tur ta ladron y nada lo cambia’.

Algun hende lo compara e comportacion sumiso di aceptacion aki, cu e baca cu ta bay wordo mata na abattoir. Un comparacion interesante, pero tin un diferencia importante. Ainda e baca ta protesta door di haci su sushi prome cu e wordo mata. Kisas pa asina duna esun cu lo mat’e trabou of kisas pasobra e ta duna e baca un pensamento placentero con esun tin cu limpia su sushi despues. Hecho ta cu corupcion den gobierno a explota den e ultimo añanan y parce cu hopi hende y instancia ta prefera di cera wowo pa no mira of wordo confronta cu e realidad amargo. Awendia hasta un ciego por mira cu corupcion a bira algo di tur dia. Den pasado un politico a yega di declara: ‘Bisa’mi ken no ta meti den droga’. Wel awendia e frase aki por wordo modifica pa: ‘Bisa’mi cua proyecto di gobierno no ta pesta cu corupcion y soborno’. E no ta un secreto publico cu diferente politico tradicional (y ambtenaar) diripiente a bira miyonario. Pero di un investigacion pa sa di unda nan a saca nan fortuna milagroso, nada!

Diferente biaha nos di partido ABO a mustra cu tin suficiente indicacion cu den e proyecto ‘Caminda Scur (Black Corridor)’ tin hopi malversacion di fondonan publico, cu ta hustifica un investigacion profundo y imparcial di e proyecto. Na Colombia e vice-presidente a declara cu nan ta pagando 3.99 miyon florin pa kilometer caminda, y esey ta encera ‘la construcción de 13,5 kilómetros de nueva calzada, el mejoramiento vial de 51 kilómetros y la rehabilitación de 68,9 kilómetros más. Además, el desarrollo de 28 puentes, 10 carriles de adelantamiento, un intercambiador a nivel y otro a desnivel (Vanguardia, 21 juli 2016)’. Pero aki na Aruba, un compania Colombiano ta construyendo un par di kilometer di caminda di 2 via (sin ‘betonband’) y 2 brug, pa entre 75 y 94 miyon florin pa kilometer. Con por ta? Ken no por mira cu algo ta hopi fout den e proyecto aki y cu e mester wordo investiga? Ken ainda por pensa cu e proyecto aki ta algo bon? Ken no por wak cu e proyecto fracasa di tram, tabata e ‘test case’ pa e proyecto ‘Caminda Scur’, pa mira con por malversa mas fondonan publico y ‘GET AWAY’ cu’ne?

Manera henter pueblo sa cu nos poder legislativo no ta funcionando y cu e poder ehecutivo ta e mes ta esun envolvi den e scandal miyonario di proyecto ‘Caminda Scur’, nos di partido ABO a acudi na e  poder hudicial (Ministerio Publico) dia 12 mei 2016, pa apela pa nan si asumi nan responsabilidad y haci un investigacion riba e proyecto ‘Caminda Scur’. Riba 7 juli 2016, cual carta nos a ricibi 1 augustus 2016, Ministerio Publico a contesta partido ABO lo siguiente:

‘Nog afgezien van het feit dat ‘belangenverstrengeling’ als zodanig niet strafbaar is gesteld in het Wetboek van Strafrecht noch elders, zijn de aspecten die u in uw aangifte opsomt onvoldoende om het vermoeden te doen rijzen dat sprake is van enig strafbaar feit. Ik ga dan ook niet over tot het instellen van een strafrechterlijk onderzoek naar aanleiding van uw aangifte’.

Un contesta hopi lamentabel di parti di Ministerio Publico. Lamentabel, pasobra den e caso di ‘Bouwfraude-klokkenluider Bos (2001)’, na unda a wordo divulga con companianan di construccion tabata horta gobierno y soborna ambtenaar Hulandes pa asina haya proyectonan miyonario di infrastructura, e Ministerio Publico Hulandes a dicidi despues di 12 aña pa para e persecucion di señor Bos den e ‘maatschappelijk belang van klokkenluiders (NRC, 18 november 2013)’. E caso tambe a revela cu e practica tabata uno normal, uno structural, cu e tabata wordo uza pa añanan largo y na unda hopi miyones a wordo horta di e forma aki di e sociedad. Pues nos Ministerio Publico mester por ta na altura of por haya sa precies con corupcion y soborno ta tuma luga den proyectonan di infrastructura y sigur e mester sa cuanto daño esaki por tin pa un sociedad. E postura di no cuminsa un investigacion di parti di nos Ministerio Publico, por wordo interpreta como tanten cu no bin un ‘klokkenluider’, nada ta wordo investiga. Den e Aruba di 2016, unda un cultura di miedo y intimidacion ta wordo practica activamente pa gobierno, e chens cu un ‘klokkenluider’ lo haci un denuncia, ta hopi chikito. Pues Ministerio Publico ta duna e señal cu como ‘belangenverstrengeling’ no ta regula pa ley, soborno y corupcion ta permiti. E postura aki tuma pa Ministerio Publico por ta ‘juridisch correct’, pero ‘maatschappelijk incorrect en fout’.

Locual ta molestia y haci hopi dolor cerca hopi hende den nos comunidad, ta e conocemento cu kisas den futuro ora cu Ministerio Publico lo wordo forsa pa investiga y actua, ya caba hopi miyones lo a disparce y e esunnan culpabel lo haya djis un ‘tikje op de vingers’ mientras cu pueblo ainda lo ta pagando locual a wordo malversa. Net manera a sosode na Hulanda den e asunto di ‘Bouwfraude’. Wel e mensahe na e politico tradicional, cu a drenta politica como un ‘nobody’ pero awe riba custia di pueblo kier aparenta como un ‘somebody’ y na Ministerio Publico, nos di partido ABO lo sigui lucha contra corupcion y keda insisti cu den e proyecto ‘Caminda Scur’ tin hopi corupcion y soborno. Pa un comunidad, humilde, honesto y mientrastanto pober, e forma di ehecuta proyectonan di e manera aki, ta contra tur ley di etica, integridad, moralidad y humanidad. Hortamento tabata fout, e ta fout y semper e lo keda fout. Ni maske cu awendia e por wordo legalisa den parlamento of intencionalmente parlamento no kier haci’e of ‘belangenverstrengeling’ un delito castigabel, nan ta keda asuntonan repudiabel cu pueblo tin cu rechasa masalmente y bisa NO MAS!