E ‘Caminda Scur’, un testimonio visibel di hortamento publico sin escrupulos

25 Juli 2016

Tin un dicho ta bisa cu ni cuanto lipstick bo pone riba un porco, e ta keda un porco. Algo similar gobierno ta haciendo cu e ‘Caminda Scur’, alias ‘Black Corridor’. Pa cuminsa e no ta un ‘corridor’, pero un caminda simpel di 2 via. Cu gobierno kier manipula y susha wowo di pueblo cu pasobra a traha 4 via entre e rotonde di Pos Chikito y Isla di Oro, esaki no ta haci e caminda un ‘corridor’. Mas ainda y pa ta exacto, e adaptacion di ‘glamour’ aki ta ‘KAPITAALVERNIETIGING’. Pasobra gobierno intencionalmente lo kibra e caminda existente pa pone uno banda di dje. Tambe e adaptacion di e caminda, lo aumenta e riesgo pa e habitantenan den e area menciona barbaramente. Si awor e molester di zonido y polucion tabata un tiki aleha for di nan cas, awor gobierno (sin consulta pueblo y e habitantenan aki) a trece e molester di zonido y polucion hopi cerca di nan cas. Pa nos no papia di e calor y e peliger pa nan y nan famia, manera e trafico a yega un poco mas cerca di nan cas. Tur esaki pasobra gobierno kier laga e proyecto aparenta ‘Green’, pa tapa wowo di un parti di pueblo cu e la destrui hopi kilometer di naturaleza (incluso mangel na Spaans Lagoen) sin un estudio ambiental. Segun e minister di Infrastructura cu e adaptacion aki, e habitantenan di e bario (hunto cu, segun e minister, ‘e Chines’) lo haya un parke. En realidad, esaki ta un otro forma ‘sneaky y scondi’ pa bende mas ‘klinkers’ y pa gaña e habitantenan cu nan a haya algo di e gobierno. Masha bunita regalo. Awor e habitantenan por sinta den e parke ‘Green’ pa mira auto, come polucion y aumenta e riesgo pa wordo mata pa un auto.

 

Tur esfuerso ta wordo haci di parti gobierno pa bende e ‘Caminda Scur’ como algo bon pa e economia di San Nicolas, mientras cu en realidad e ta e ladronicia publico mas grandi di Aruba su historia y kisas di mundo. Na mei, partido ABO a entrega un keho na Ministerio Publico pa investiga e proyecto aki riba corupcion, manera parlamento no kier haci nada pa para e hortamento structural di fondonan publico. Mundialmente proyectonan di infrastructura ta wordo uza pa horta pueblo. World Bank: ‘..public work contracts, including roads, are subject to SUBSTANTIAL levels of CORRUPTION’. Transparency International: ’..public works contracts and construction is the sector with the HIGHEST propensity of paying bribes to OFFICIALS and other firms’. Nos a ilustra cu e ‘Caminda Scur’ ta costa entre 9 y 67 biaha mas caro pa kilometer, cu na otro paisnan. Con por ta posibel cu na paisnan cu tin un entrada nacional hopi mas halto cu Aruba, nan si por construi camindanan pa un prijs hopi mas abou?

 

Un otro prueba cu nos ta pagando demasiado pa e ‘Caminda Scur’, un proyecto cu no tabata necesario of cu no tabatin prioridad, a bolbe bin di Colombia. Si, e pais di e mesun compania cu ta encarga pa construi e ‘Caminda Scur’. Diahuebs pasa, e vice-presidente di Colombia a firma pa e inicio di e ‘Autopista 4G Bucaramanga-Pamplona’ pa COP 888 mil miyon (Vanguardia, 21 juli 2016). Pues e vice-presidente a firma pa paga 3.99 miyon florin pa kilometer. Aki na Aruba nos ta pagando entre 75 y 94 miyon pa kilometer.

 

Pa pueblo compronde mas miho y pa pone den un contexto mas realistico pa duna un indicacion con grandi e hortamento den e ‘Caminda Scur’ ta, e gobierno Colombiano ta haya pa nan 3.99 miyon: ‘la construcción de 13,5 kilómetros de nueva calzada, el mejoramiento vial de 51 kilómetros y la rehabilitación de 68,9 kilómetros más. Además, el desarrollo de 28 puentes, 10 carriles de adelantamiento, un intercambiador a nivel y otro a desnivel’. Aki na Aruba, pueblo lo haya un caminda di entre 8 y 10 kilometer cu 2 via, 2 brug, hopi ‘kapitaalvernietiging’ y algun ‘klinkers’ pa entre 75 y 94 miyon pa kilometer!

 

Pues pueblo, sea gobierno no sa negocia of ta intencional e la firma e contract ‘Caminda Scur’ pa horta pueblo, manera World Bank y Transparency International ta menciona cu ta pasa den proyectonan di infrastructura. Interesante pa sa unda tur e expertonan gubernamental a keda ora e contract aki anti-pueblo a wordo firma. No ta berdad cu tur ambtenaar a huramenta tambe pa traha na bienestar di pueblo?

 

E tempo cu gobierno por a gaña pueblo cu ponemento di ‘klinkers’ y anunciando tur sorto di proyecto pa tapa su incapacidad y corupcion structural, a pasa. Cada dia mas hende su wowo ta habri y cada dia mas hende ta desaroyando un inmunidad pa e ‘Sunchi y Brasa’ propaganda. Pues ni maske cuanto di bo placa gobierno ta uza pa haci propaganda pa su mes of pa pinta su poco proyectonan dudoso bunita, nan ta keda proyectonan anti-pueblo. Cada dia mas hende ta realisando cu tur e propaganda politico di Aruba di 5 strea y vision ‘Green’, tabata un mentira pa tapa e hortamento structural di pueblo y su futuro generacion. No lubida cu ora e politico tradicional no por a traha un scol of un cas social pasobra e tabata mucho ocupa cu su proyectonan dudoso y cuestionabel cu tin e solo meta pa enrikece un grupito selecta, esaki lo por wordo considera como hortamento di bo persona y bo yiunan. Ningun hende cu ‘common sense’ ta gusta of lo kier wordo horta y viola cada dia. Pues cada biaha cu bo persona pasa banda di e ‘Caminda Scur’ of cualkier otro proyecto ‘Green’, corda cu esakinan no ta simbolonan di progreso, pero testimonionan visibel di hortamento publico sin escrupulos.

Please reload