‘Ready Kilowatt LED-man is back’. Corda cuida e wowonan e biaha aki si!

18 Juli 2016

Historia ta mustra cu husto e politiconan mas debil y malo, tabata uza escritornan (prensa) pa fabrica un imagen bunita di nan, pa asina laga pueblo kere cu nan tabata un gran lider. Historia tambe ta mustra cu despues di tempo, ningun di esakinan a logra nan meta di glorificacion eterno den historia, a laga nan pais destrui y den pobresa atras y tur a termina hopi malo. Algun ehempel di politico debil y malo, tabata Adolf Hitler (Alemania), Idi Amin Dada (Uganda), Jorge Rafael Videla (Argentina), Saddam Hussein (Iraq) y Jean Claude Duvalier-Baby Doc (Haiti). Tin hopi mas, pero mencionando esakinan, kisas pueblo por recorda kico esakinan a haci cu nan pueblo y e tacticanan di indoctrinacion cu a wordo uza pa logra nan meta politico di destruccion y teror. Kisas pueblo tambe por nota un similaridad, den e actualidad.

 

Na Aruba, algun consehero bon paga tabata asina convenci di nan mesun locura, a yega na e conclusion cu Aruba a bira mucho chikito pa un politico tradicional y cu e la bira tempo pa e campaña ‘Sunchi y Brasa’ wordo lansa na nivel mundial. E campaña ‘Sunchi y Brasa’ mester a conkista mundo henter, y p’esey e la ricibi un ‘make-over di glamour’ pa haci’e mas chic. Aruba y mundo a wordo confronta cu e ‘Hulanda UN Globetrotter-man’. E proyecto aki no a bay manera nan a spera, y mientrastanto tur sa cu e campaña ‘Hulanda UN Globetrotter-man’ a fracasa, a pesar cu e la costa miyones pa haci’e exitoso. Awor e mesun conseheronan, a dicidi di pa reintroduci e campaña chistoso di ‘Handyman’, ‘Tuinman’ y ‘Bobcat-man na waf’ aki na Aruba atrobe. Solamente den e ‘re-make’ aki, tin e figura nobo di ‘Ready Kilowatt LED-man’. Tur esaki como un intento pa pone pueblo lubida e fracasa global y cu e ‘superstar berde’ ta disponibel atrobe pa ‘traha pa Aruba y su pueblo’. E figura di ‘Ready Kilowatt LED-man’ no a bin di nada of di chiripa. E conseheronan a pensa hopi bon riba e idea aki. E ‘superstar berde’ mester briya mas duro cu antes pa no solamente haci e pueblo ciego atrobe cu su luz berde magico, pero alabes pone tur su otro coleganan den e sombra di su luz briyante, special esun di ‘lightning parade’.

 

Durante henter e spetakel di e reapertura di e ‘mehorador’, e tempo ey  ‘Hulanda UN Globetrotter-man’ a scoge pa un posicion di ‘backstage’ y a laga su colega ministernan tuma tur e honor y gloria (y posiblemente tur e culpa tambe). Hasta e la tolera cu e minister di Energia por a haci e anuncio riba e dia cu e la haci aña, 13 Mei 2016. Por ta kisas p a esaki tur fraccion den parlamento a grita ‘Pabien’. Pero awo tur cos a cambia, despues di e fracaso di e campaña  ‘Hulanda UN Globetrotter-man’, y manera ta e custumber den e partido ey, tur hende mester para den sombra di e ‘gran lider’. E ultimo dianan tur e imposibel ta wordo haci, incluso si mester yama e parlamento ‘pabien’ bek for di vakantie, pa asina e anuncio y firmamento berdadero di e reapertura di e ‘mehorador’ por tuma luga riba e fecha di nacemento di señor prome minister Mike Eman, 1 september 2016. E gran lider su fecha di nacemento mester ta esun cu pueblo tin cu corda y no esun di cualkier minister comun. Tristo pa e pober minister di Energia pa mira cu su ‘logro’ historico di 13 Mei 2016, lo wordo reemplasa pa esun di e ‘superstar berde’ di 1 september 2016.

 

‘Ready Kilowatt LED-man is back’ pa blind tur hende cu su luz berde magico. Corda cuida e wowonan e biaha aki si!

Please reload