13 Juli 2016

Dia 13 Mei 2016, tur fraccion den parlamento a core duna gobierno ‘pabien’, cu e supuesto reapertura di e ‘mehorador’, sin cu nan a wak un solo documento. Partido ABO tabata e prome y unico partido politico, cu a cuestiona e postura repudiabel aki di ‘rancamento di cakiña’ di nos parlamentarionan. Tur a pone nan interes politico na prome luga enbes esun di pueblo, pa locual nan a huramenta pa haci. No tabata interesa nan cuanto e aventura biyonario aki lo a costa pueblo atrobe. No tabata interesa nan cuanto ‘finder’s fee’ lo a wordo paga atrobe na e grupito privilegia, a costo di pueblo. E unico cu tabata importante pa nan, tabata saca e ‘juice politico’: gaña pueblo cu danki na nan, Aruba lo haya un ‘mehorador’.

E persistencia di partido ABO pa cuestiona y informa publicamente cu e ‘CITGO/PDVSA-deal’ no ta ‘make good business sense’ y cu e no ta den beneficio di Aruba, a pone algun fraccion cambia nan engaño original di 13 Mei 2016, pa esun di ‘ora e ‘CITGO/PDVSA-deal yega parlamento, nan lo por cambi’e y hasta par’e’. Ora pueblo a pensa cu porfin parlamento (y pueblo) lo mira algo di e ‘CITGO/PDVSA-deal’ di 2000 pagina siman pasa durante e ‘bijeenkomst’, parlamento no a haya nada pero en cambio a haya un presentacion di gobierno. E mesun presentacion cu gobierno a mustra tur otro hende prome.

Pa scapa cara, desde diamars 5 juli 2016, e engaño original a bira ‘nada a wordo firma’. Pues un otro engaño pa no admiti cu tur fraccion no a haci su trabou y cu nan a hunga riba e emocion sentimental di pueblo cu e cabay di campaña ‘refineria’. E partidonan den oposicion a mira con partido AVP a uza esaki efectivamente durante e eleccionnan di 2009 y 2013 pa drenta den gobierno, y awor nan tampoco kier a keda atras. P’esey nan tambe a scoge pa no bisa pueblo e berdad tras di e ‘CITGO/PDVSA-deal’.

Pero e manipulacion y e tragedia di reapertura di e ‘mehorador’ no a caba eynan. Tin politico tradicional ta lubida (intencionalmente of no), kico nan a bisa of haci. Kisas nan ta ‘lubida’ pasobra nan sa cu e pueblo aki ta lubida lihe y ta acepta tur cos di e clase politico sin cuestion’e. Despues cu e miembro di parlamento cu a declara publicamente ‘danki na dje e refineria lo habri’, awor su lider politico ta declara, partido MEP a duna ‘pabien’, sin wak te awe un solo documento di e ‘CITGO/PDVSA-deal’, pasobra MEP a ‘confia y kere den e palabranan di señor Mike Eman’ (Conferencia di prensa di partido MEP, 11 juli 2016).

Wel, wel. Despues di a bisa pueblo tur dia y pa 7 aña largo cu señor Eman no ta sincero of cu e ta di confia, awor diripiente MEP a ‘confia y kere e palabranan di señor Eman’ ciegamente. Nos di partido ABO ta sigur, cu net despues di e conferencia di prensa aki, e retorica bieu di cu señor Eman no ta sincero of ta di confia, a wordo retoma. E lo tabata na su luga pa admiti cu e fraccion di MEP a haci un eror di sostene e ‘CITGO/PDVSA-deal’ 13 Mei 2016, sin wak un documento y cu e interes partidista a prevalece riba esun di pueblo. E lo tabata sincero pa pidi pueblo disculpa pa trata di manipula pueblo cu informacion incompleto y incorecto, enbes di controla y exigi e ‘CITGO/PDVSA-deal’ di 2000 pagina. E lo tabata di elogia, si e lider di MEP lo a tuma e postura di remordimento di consenshi, manera e dos miembro di fraccion di AVP a haci den e asunto di ‘geregistreerd partnerschap’, y priminti pueblo cu nunca mas e lo trata di cubri probecho partidista culpando of uzando otro.

Desde luna pasa partido ABO a declara cu tur fraccion a haya confirmacion di Hulanda, durante e reunion ultimo di IPKO, cu Aruba tin recursonan mineral. A pesar cu nos a cuestiona e postura ‘sneaky y scondi’ di tur fraccion den e materia aki, te awe ningun parlamentario a exigi di e minister di Energia claridad of puntr’e dicon Hulanda si sa di e recursonan mineral di Aruba, pero parlamento di Aruba no. Kico ta Hulanda su rol den e asunto aki? Dicon atrobe e informacion valioso aki, mester keda scondi pa pueblo?

Dos siman pasa, partido ABO a sugeri parlamento pa busca ayudo cerca algun instancianan internacional y imparcial, cu si ta domina materianan complica manera esun di e ‘CITGO/PDVSA-deal’. Asina e instancianan aki por yuda parlamento analisa y studia e acuerdo monstruoso y tecnico di 2000 pagina, teniendo cuenta cu nan capacidad limita. Tambe siguiendo e sugerencia gratis aki di partido ABO, nos parlamentarionan no lo tin cu bin gaña of manipula pueblo atrobe, cu e ‘CITGO/PDVSA-deal’ ta bon, mientras cu hasta Jose Feliciano por mira cu e no ta. Tambe e lo preveni cu nos parlamentarionan lo bolbe haci nan mes ridiculo, ora nan declara cu nan si a studia e acuerdo tecnico di 2000 pagina den algun minuut of cu nan a bolbe ‘confia y kere e palabranan di señor Eman’ ciegamente.

Siman a habri, y e noticia a drenta cu gobierno di reino a tuma e decision pa envolvi College financieel toezicht (Cft) den e asunto di e ‘CITGO/PDVSA-deal’. A pesar cu e ta obvio cu Cft no ta domina e materia aki completo, e ta un comienso y e ta algo positivo. Ban spera cu ainda mas institutonan profesional y imparcial lo wordo envolvi pa studia e acuerdo di 2000 pagina, cu cada dia ta birando mas controversial. Awor cu Cft a wordo envolvi den e ‘CITGO/PDVSA-deal’ pa haci e trabou di control cu nos parlamento ‘pabien’ a nenga di haci, ban wak cua fraccion lo bay yora of organisa un show emocional di entrega di autonomia, pa sconde su rol complaciente den e aventura biyonario aki, cu sigur lo hinca pueblo y su futuro generacionnan den mas debe y miseria si e bay dor.