Scucha mi palabranan, pero no mira mi actonan di crimen contra mucha

11 Juli 2016

E no ta un secreto publico cu gobierno a gana eleccion uzando palabranan bunita y PR pa gaña un parti di pueblo. Tampoco ta un secreto publico, cu gobierno nunca a stop di campaña, solamente awor e ta uzando fondonan publico. Miyones di pueblo su placa, ta wordo gasta na show y PR pa sigui manipula y indoctrina. Esaki riba su mes ta un abuso lamentabel. E ta bira un crimen, ora e ta wordo haci contra muchanan.

 

Gobierno a priminti den su programa di gobernacion 2013-2017: ‘..verbetering van inrichting en rendement van het onderwijs is de rode draad. Verbeteren van de kwaliteit, relevantie, efficiency en doelmatigheid op alle niveaus van onderwijs is de insteek’. Pues gobierno a priminti di hisa y mehora e nivel di educacion durante e periodo di gobernacion aki.

 

Analisando e cifranan di e resultadonan di examen di e periodo di gobernacion aki pa HAVO y VWO, pueblo por constata un caida structural. Den e aña escolar 2011 pa 2012, e cantidad di graduadonan di HAVO y VWO pa Colegio Arubano, tabata respectivamente 74% y 79%. Despues cu Colegio Arubano a paga 2 rector un salario miyonario pa mehora e resultadonan, esakinan a empeora. E cifranan di graduacion a bira e aña aki pa HAVO y VWO respectivamente 68% y 65% (Dienst Inspectie van het Onderwijs, 5 juli 2016).  Un caida hopi grandi bou di e graduadonan di VWO. Pa Colegio San Nicolas e cifranan di graduacion pa HAVO tabata den e periodo 2013 pa 2014, 70%. E cifranan di graduacion a bira e aña aki 62%. Tambe un caida.

 

Remarcabel tabata e caida di e cifranan di graduacion pa tur e scolnan MAVO na San Nicolas. Den e periodo 2011 pa 2012, e cifranan di graduacion tabata 79% pa Abraham de Veer College, 77% pa Filomena College, 91% pa John Wesley College, 95% pa St. Augustinus College. E aña aki e cifranan di graduacion a bira 55% pa Abraham de Veer College, 60% pa Filomena College, 75% pa John Wesley College, 81% pa St. Augustinus College (Dienst Inspectie van het Onderwijs, 5 juli 2016).

 

Pues e cifranan ta mustra cu tin algo structural fout den e maneho di educacion y cu gobierno no a cumpli cu nada di locual e la priminti den su programa di gobernacion. Tampoco e ta realistico pa pensa cu un aña prome cu eleccion, cu esaki lo cambia. Ni maske cuanto potret e minister  di Enseñansa saca banda di un scol cu a dura 100 aña pa wordo renoba, di cual su cabesante ta un miembro di parlamento, e no por sconde cu su maneho a fracasa total y cu e la causa hopi daño nan nos muchanan. E maneho di verfmento di edificio y sacamento di potret, no por sconde e daño aki.

 

E cifranan di graduacion, ta mustra cu gobierno a pone su mesun interes partidista na prome luga, enbes di e interes di e futuro generacion. Intencional y structural gobierno a scoge pa destrui e sistema educacional pa asina haci e pueblo mas dependiente di e politico tradicional. Cu e politica maligno y destructivo aki, gobierno tambe ta haciendo e pueblo aki cada dia mas sumiso y dependiente di otro nacionalidadnan. Un pueblo cu poco educacion, no por cuida of defende su mes. Esaki ta un crimen cu pueblo nunca lo tin cu lubida, ni pordona.

Please reload