Tin trabou, pero asina mes no ta resta placa pa haci algo ‘leuk’ mas

4 Juli 2016

Diferente biaha nos, varios otro gremio y algun medio di prensa ta keha riba e falta di data di nos sociedad. Sin data actual y confiabel, e ta imposibel pa hiba un maneho of discusion riba nivel. Asina tur discusion lo keda den e orbita emocional, unda esun cu por manipula, indoctrina, gaña y grita mas miho, semper lo tin rason. Nos ta bibando den 2016. Un tempo moderno, unda muchanan ta haya ‘smart phone y tablet’ como regalo. Un tempo unda algun minister tin mas coordinador, cu hopi departamento gubernamental. Y ainda gobierno no por (kier) publica data actualisa di e estado socioeconomico di e isla. Nos di partido ABO a yega na e conclusion cu esaki ta wordo haci intencionalmente. Pasobra sin data (imparcial), un gobierno por sigui manipula, indoctrina y gaña un parti di e pueblo. Laga un parti di e pueblo kere cu e situacion socioeconomico di e isla ta bon y cu e aumento di desempleo, criminalidad y insiguridad ta ‘solamente un percepcion’, manera varios minister a bisa pueblo na diferente ocasion.

 

Tur pais of gobernacion serio, ta publica regular e data socioeconomico. Esunnan cu tin algo di sconde y cu no ta sincero cu nan pueblo, no ta publica e informacion aki. Anto e pregunta ta, si no tin data, riba kico gobierno ta basa su maneho? E no ta suficiente, tolerabel y hasta ridiculo pa basa un maneho riba ‘un soño’. Ni con bunita e soño por ta, e realidad amargo ta rekeri seriedad. Nos tin un departamento di estadista, pero e ultimo cifra riba desempleo ta di 2007! Nos tin un departamento di labor, pero eynan tampoco pueblo por haya e cifra riba desempleo. Solamente ‘Brochures y Formulieren’ departamento di labor ta ofrece pueblo.

 

Ni cu gobierno a wordo obliga pa pone e departamento di estadista funciona atrobe na un manera imparcial y profesional (Protocol 2 Mei 2015), pueblo no a mira un mehoracion. Hasta parce cu gobierno ta haci mas esfuerso pa no pone e departamento funciona, pa asina ningun informacion sali, manera nos ta den un aña electoral y campaña a cuminsa.

 

Cada dia tin mas hende ta puntra nan mes pa kico nan ta traha, manera ningun placa ta resta pa haci algo ‘leuk’ ora nan caba di paga tur e gastonan mensual. Esaki no ta ‘un percepcion’. Awendia tin mas hende bibando den pobresa, mientras cu nan ta traha. E tempo cu tin un trabou tabata sinonimo cu un hende por cuida su mes y su famia, a pasa. Awendia tin mas hende cu debenan cu nan no por paga bek, cu na su turno ta conduciendo na un aumento di problemanan familiar y social. E causanan principal pa e fenomeno negativo aki ta:

  • Tin menos trabou duradero y structural, pero mas trabou temporal;

  • Abuso laboral;

  • Sclavitud moderno;

  • Cheap Labor;

  • Un maneho descontrola di inmigracion;

  • Negoshi di tur sorto di permiso pa stranhero.

 

Awendia ta dificil pa un hende local haya un trabou duradero y bon paga. Tur locual tin ta temporal y mal paga. Banda di esaki, un parti grandi di e forsa laboral (formal y informal) ta wordo forma pa hendenan di otro nacionalidad, y ta nan mes ta percura pa nan ‘landgenoot of compatriota’ haya e cupo di trabou, prome cu un hende local. Tur esaki cu cooperacion y bendicion di gobierno, cu ta duna (bende) tur sorto di permiso enbes di regula y proteha e mercado laboral. E solo hecho cu algun luna pasa mas di 5000 hende a bishita un ‘Job Fair’, ta indica cu tin hopi hende sin trabou. No lubida cu hopi hende no a acudi na e evento ey, manera hopi hende a consider’e como un actividad politico. No lubida cu hopi hende tin berguensa pa admiti cu nan ta sin trabou. No lubida cu hopi hende ta traha den e sector informal, cu no ta wordo registra.

 

Ya caba tin hopi hende ta traha 2 y 3 trabou, djis pa por cumpli cu nan obligacionnan basico mensual. Awor si nos agrega e cantidad di muchanan cu a caba di gradua e luna, pero cu no lo haya un trabou, anto e ta obvio cu e situacion socioeconomico personal y familiar, solamente lo empeora. Pero enbes di reconoce y admiti cu e structura social di nos sociedad a wordo kibra y cu e ta den un crisis serio, nos gobierno ta prefera di sconde data, hinca pueblo den mas debe innecesario, mantene e frontera hancho habri, stimula e fenomeno di ‘Cheap labor’ y organisa tur sorto di festival miyonario cu artistanan stranhero, pa laga un parti di pueblo (y special e hobennan) lubida un rato riba nan miseria diario y e pobresa creciente. ‘Spiegeltjes, kraaltjes y vuurwater’ atrobe!

Please reload