Un otro ‘Witte Donderdag’ y atrobe placa a wordo fia riba mercado internacional

24 Maart 2016

Ken no ta corda e tantisimo fiesta y show di tres siman atras riba e supuesto logro di 2% deficit presupuestario, manera palabra den e ‘Balanced Budget Akkoord (BBA)’. Hasta e minister di Finansas, despues di a canta ‘wega gana’, a declara: ‘..tur hende sa cu tin un asina yama Witte Donderdag akkoord caminda Hulanda di su banda a priminti cu nan lo habri e posibilidad ey y e facilidad kiermen cu nan lo inscribi na momento cu Aruba mester fia atrobe’, pero cu ‘..mester por sinta cu Hulanda na mesa y CONVENCE nan cu nan por cuminsa di duna e facilidad pa e parti di financiamento..’ (Bon Dia, 26 februari 2016).

 

Wel, un siman despues atrobe a batayon di ministernan y ‘hulpjes’ a biaha pa Hulanda unda nan lo a ‘convence’ y refresca Hulanda su memoria riba locual a wordo palabra den e ‘Witte Donderdag akkoord’ di 2013. Pero despues, tur cos a bira keto. Nada mas di ‘gespierde taal’ rumbo Hulanda. E unico cu a wordo ‘logra’ na Hulanda, y esey CAft a confirma siman pasa, cu gobierno a haya aprobacion pa fia atrobe mas placa riba e mercado internacional pa refinancia cierto debenan bieu di Aruba.

 

Esaki ta mustra claramente cu e supuesto logro di 2% deficit presupuestario, no ta real y cu e ‘logro’ ta mas bien basa riba ‘triki-nomics’ y hortamento di placa di pueblo for di e fondo SVB. By the way, te ainda e miembronan (doñonan di placa), no a haya contesta di esunnan di SVB kende a duna nan autorisacion pa regala gobierno 60 miyon florin, manera e placa tabata di nan of di gobierno.

 

Pa suerte, gobierno por a ofrece pueblo e show di 18 Maart y asina pone pueblo lubida cu e no a logra nada na Hulanda cu su ‘vriendjes’ y cu e la wordo manda New York pa presta placa. Aki bo ta mira cu Hulanda no kier core e riesgo door di cumpra debenan Arubiano basa riba cifranan ficticio, pero a scoge pa laga Aruba fia placa riba mercado internacional na un interes mas halto.

 

Pues di e ‘bon relacion di confianza cu Hulanda’ cu gobierno ta gusta papia di dje, den practica pueblo no ta mira mucho. E unico cosnan palbabel cu pueblo ta mira di e ‘bon relacion’ aki, ta cu un algun ‘vriendjes’ politico Hulandes ta bini regular Aruba pa bisa algun ‘lieve woordjes’ pa consumo local. E ta hopi ‘leuk’ pa mira con algun politico Arubano di supuesto taya, ta wordo ‘aan het lijntje gehouden’ y cada biaha ta wordo manda ‘met een kluitje in het riet’ door di Hulanda.

 

Un otro ‘Witte Donderdag’ ta na porta y ainda gobierno no por a ‘convence’ Hulanda. Pero si gobierno ta campeon di bende pueblo mentiranan grandi como ‘Witte leugentjes’. Realmente ‘SIN PALABRAS’ pa mira con un gobierno di signatura Cristian Democrata, por haci esaki cu un pueblo humilde y creyente.

 

‘Feliz’ dianan di Pasco!

Please reload