Promocionando ladronicia y hortamento

17 Maart 2016

Manera mayoria di nos poblacion ta catolico y cu nos ta den cuaresma, ban refleha riba dos di e dies mandamento: 6. No haci cos deshonesto y 7. No horta. E dos mandamento, ta papia den nan esencia di moralidad y integridad. Si nos aplica e dos mandamento aki riba gobernacion, anto nos lo yega na e tristo conclusion cu hasta e leynan di Dios, no ta wordo respeta pa un gobernacion cu un signatura Cristian.

 

Algun aña atras, cu aprobacion di algun sindicalista den e hunta di supervision, Algemeen Pensioenfonds van Aruba (APFA) a exonera gobierno pa paga algun cien miyon florin locual gobierno tabata debe e fondo. Esey a sosode bou presion di e flamante minister Albertico Croes. Aña pasa algo similar a bolbe pasa. Solamente e biaha aki, tabata Sociale Verzekeringsbank (SVB) cu a regala gobierno mas di 50 miyon florin.

 

Den ambos caso, gobierno tabata kita mensualmente ‘premie’ (placa) di e miembronan di e fondonan nan salario, pero nunca e tabata deposita esaki of e parti locual gobierno mester a paga na ‘premie’. Awor den bida comun di Buchi, si un dunado di trabou haci algo similar, esaki lo wordo considera como ladronicia y hortamento. Hasta e dunado di trabou lo wordo persigui penalmente. Den e caso aki, nada a pasa pasobra e tabata gobierno cu a horta. Miyones a wordo malversa y regala sin consulta e doñonan di e placa cu cooperacion di APFA y SVB, y tur hende a keda keto. Hasta e regalo di SVB, ta wordo uza pa pronkia con gobierno a baha e deficit financiero na december 2015.

 

Consecuencia di e regalonan aki ta cu, awendia e miembronan mester traha mas largo, ta haya menos pensioen y mester cera nan boca pasobra gobierno a regala e pensionadonan algun 10 florin (cu alabes ta aumenta e debe nacional). Pa completa e obra maestral di e ladronicia legal aki. Aña pasa, gobierno a bay gaba con e a salba e fondo di pensioen. En realidad locual a wordo ‘paga’, tabata nada menos cu un otro debe cu gobierno a acumula despues di e exoneracion miyonario di algun aña pasa. Tambe gobierno a lubida di bisa pueblo cu e la wordo obliga pa ‘College financieel toezicht (Cft)’ pa paga esaki. Remarcabel pa mira con e miembronan di e fondo y e sindicalistanan den e hunta di supervision, a guli e ‘fastball’ aki sin hik.  Preguntanan:

  • Kende a duna e directornan y e hunta di supervision di e fondonan, autorisacion pa regala gobierno miyones di placa cu no tabata di nan?

  • Dicon no a consulta cu e miembronan (doño di e placa) prome cu a regala e miyones?

  • Con por ta cu gobierno por keda añanan largo sin paga ‘premies’, cu e ta kita mensualmente for di e miembronan?

  • Esaki no ta ladronicia y hortamento?

 

Locual a wordo ilustra, ta mustra claramente con algun politico a haci pueblo ciego y sumiso durante añanan.  Tanten e ta gobierno cu ta horta y suta, e ta bon. E ta keda toch straño pa mira con un pueblo orguyoso y religioso, bira uno cu ta acepta promocion di ladronicia y hortamento.

Please reload