Dia 1 Maart, pueblo lo haya sa kende ta e premier berdadero di Aruba

25 Februari 2016

Falta menos cu un siman pa 1 di Maart yega. Pa esunnan cu no sa of cu a lubida kico ta haci e fecha aki  special, wel riba e dia aki e minister di Turismo mester entrega su retiro, manera el’a anuncia na gobernador algun siman pasa. E motibo principal cu el’a duna gobernador tabata: cu e no tin CONFIANSA mas den su colega ministernan. Straño cu e minister di Turismo no a bandona su posicion na e momento ey, pero cu el’a scoge pa anuncia su retiro. Ora un persona bisa cu e no tin confiansa mas den un otro persona, esaki ta algo hopi serio. Ora no tin confiansa tambe, esaki tambe ta mustra cu tin un deficiencia di INTEGRIDAD y MORALIDAD.

 

Den e caso specifico aki, no ta trata di un desconfiansa entre miembronan di coalicion. Aki ta trata di un desconfiansa entre miembronan di e mesun partido. E mesun ‘famia’. Despues di e anuncio di e retiro aki, diferente miembro y sponsor di partido a core lihe pa splica pueblo cu esaki no ta nada serio, pasobra den tur famia tin diferencia di opinion. Tambe nan a pone enfasis riba e hecho cu den nan famia berde, nan ta balora opinionnan diferente. ‘Yeah, right’!

 

Pero manera esaki ta un gobierno di show, e asunto di desconfiansa entre e ministernan mester a wordo posponi, te ora cu carnaval caba. Pasobra e minister di Turismo, cu a ‘hi-jack’ carnaval como su cabay di campaña, a haya carnaval mas importante. Durante carnaval, e minister di Turismo a bolbe mustra su coleganan minister con pa bira popular sin haci mucho esfuerso, y riba custia di pueblo. Pero alabes el’a uza e fiesta publico aki, pa fortifica su posicion di negociacion cu su colega ministernan. Awor pueblo ta compronde dicon e minister no a entrega su retiro na e momento cu el’a bishita gobernador, pero cu el’a pospone esaki te despues cu carnaval?

 

Pero esaki ta mustra claramente kende tin e poder den e gobierno actual. Pasobra tur otro minister a keda keto, incluso e premier. Cu gobierno a tuma e menasa di retiro di e minister di Turismo na serio, el’a bay den un ‘over-drive’ di campaña, presentando atrobe diferente di nan cabay di campaña, manera e reapertura di refineria, e ponemento di asfalt riba e ‘Caminda Scur’ miyonario cu a destrui hopi naturaleza y e atencion diripiente pa e dump na Parkietenbos.

 

Pa laga pueblo kere cu tur cos ta ‘koek en ei’ den e gobierno, gobierno a cuminsa publica hopi potret di e premier hunto cu e minister di Turismo. Pregunta cardinal ta: Kico tabata necesario pa e minister di Turismo por a recobra e confiansa den su coleganan? Un simpel disculpa, nos di partido ABO no ta kere.

 

Wel poco poco, algun pista ta saliendo afo cu por aclaria esaki. E mesun minister di Infrastructura, cu e minister di Turismo a acusa di metemento den tereno di otro, awor ta duna e ‘krabbeltje Akkoord’ den algun minuut pa un tereno di 50.000 m2 pa un tereno di e minister di Turismo a pidi. Ta pasobra cu e minister di Turismo sa mes di e asuntonan di traspaso dudoso di terenonan cu un ‘krabbeltje Akkoord’? ‘By the way’, pa añanan largo, gobierno su maneho pa otorgamento di tereno ‘huurgrond’, ta pa NO duna terenonan grandi, manera tin un ‘scarsedad di tereno’. Un miembro di ‘management team’ na DIP, a bisa publicamente cu e tereno pidi pa e minister di Turismo, ta sali di un parcela caminda tin 11 otro hende mas cu a haci un peticion. Awor e lo ta bon pa e miembro aki, bisa tambe ki grandura e peticionnan di tereno di e otro 11 hende tin, cuanto tempo e 11 hende tin ta wardando y si nan tambe a haya e ‘krabbeltje Akkoord’ di e minister di Infrastructura. Tambe diripiente ningun hende den gobierno kier papia mas riba e asunto di e ‘WEB-hedging’ di US$ 300 miyon.

 

E ta obvio cu a pesar cu diferente minister no por biba cu e popularidad di e minister di Turismo, nan tin cu guli y acepta tur locual e ta pidi y haci. Pasobra si e sali for di gobierno, kisas hopi puyito tambe lo sali for di e macutu. Kisas nan tin miedo cu asina pueblo lo haya sa exacto con nan ta financia nan campaña miyonario. Esey nan no kier y esey no lo pasa tampoco manera tur hende tin ‘algo riba otro’. Mira con un gobierno ta keda pega na otro. E mesun practica di intimidacion y cultura di miedo cu e gobierno ta uza contra pueblo, ta e mesun practica cu tin’e wanta na otro awe. Aki e interes di pueblo no ta conta. Aki ta e interes personal ta conta: ‘Business as usual’. Pueblo lo haya sa 1 Maart, kende ta e premier berdadero di Aruba.

Please reload