CHICHI ta PUNTR'ABO

18 April 2016

Panama Papers ta sigui ta un tema cayente. Chichi ta haya straño si cu ta solamente un oficina, Mossack Fonseca, a haya problema cu lekmento. Otro cos straño tambe ta cu Merca ta un di e paisnan cu no ta riba e lista aunke parce cu nan lo a haya paspoort di 200 Americano pero ningun nomber di politico di e pais... manera nan di: ‘time will tell’.

 

Parlamento di Aruba ta keto riba e casonan di pedofilie. Algun minister a manifesta nan mes, pero niun hende a papia di ban cambia of traha ley unda por atende e muchanan victima di abuso mes ora cu e abuso tuma luga. Chichi a tende algun di e tata y mamanan bisa cu a pasa mas cu un aña y ainda e victimanan no a wordo interoga. Dicon e victima ta e ultimo atrobe? Di e forma aki ta contribui na cu e victima ta sigui sufri y e abusado ta sigui cu su fechoria.

 

Manera a wordo treci dilanti durante e manifestacion dilanti di Parlamento, e abusado tambe tin un problema psicologico. E tristo ta cu di parti di e mundo medico no ta tende nada...unda minister Alex Schwengle a keda? A pensa riba trato medico pa e tipo di problemanan aki den e proyecto di expansion di e hospital?

 

Chichi ta pensa cu esaki ta hopi necesario sino nos lo tin un comunidad saca for di balans, mas ainda di loke e ta caba. Minister Paul Croes ta bisa di ta compronde e situacion, pero esey no ta suficiente. Mester haci algo, palabranan bunita no ta resolve problema. Minister Paul Croes ta hopi zwak.

 

Ta bunita pa mira cu cierto gruponan ta trata di conserva y promove loke ta cultura di Aruba. Chichi y comer Ida a gosa u mundo di e parada di lanterna. Ta bon tambe cu ta soru pa conscientisa nos comunidad riba naturalesa cu caminata den e rooinan. Esta bunita Aruba ta!

 

Ta remarcabel cu ta e supermercadonan Chines so tin productonan cu ta smaak y hole ‘straño’. Te ainda e instancianan concerni no ta haci nada pa controla kico ta causa cu cierto productonan, hasta despues cu cushinanan, ta keda cu e smaak ‘straño’ ey. Chichi ta urgi e instancianan aki pa lanta for di e stoelnan den airco y drenta den accion pa caba.

 

Mas cu 400 empleo....Chichi ta hari bariga yen. Minister Paul Croes sa masha bon cu esaki ta nada pa e grupo grandi cu ta sin trabou. Ta di con kier tapa solo cu un dede?

 

Tempo ta pasa y nada di e refineria con un dia ta sirbi pa un cos y otro dia ta sirbi pa otro. Ta parce Chichi cu ainda no a dicidi kico ta bay haci cu e refineria. Kiermen anto cu no tin nada pa firma ainda?

Please reload