CHICHI ta PUNTR’ABO

28 Maart 2016

Pa straño cu e ta zona, e area cu a wordo rosa no ta conta como ‘area berde’, segun instancianan concerni a laga sa den un entrevista. Aparentemente tampoco sa ken ta esun cu a rosa, solamente cu e ta un N.V. Pero un caminda un hende a firma ‘blindeloos’ y e firma aki ta haci’e responsabel.

 

Chichi ta haya cu ya na Aruba no ta importa mas si cierto areanan ta wordo considera berde of no. For di tempo di e colonisado Spaño, medio ambiente ta for di balans. Pa e motibo ey shonnan, tur loke a resta na Aruba TA area berde, simplemente paso NO TIN MAS!

 

Ta con ta bisa cu no ta bin cu mas hotel na Aruba, pero e supuesto N.V. aki ta bay construi un mega-complex riba e area cu a caba di rosa? Ta pakico tin ley y regla anto?

 

Con a para cu e cuestion di terenonan otorga na minister- y parlamentarionan, sin menciona comerciantenan stranhero? Tur cos a bay den doofpot atrobe? Wel, Chichi tambe kier un pida tereno y ya cu tur cos ta bay asina lihe awendia, Chichi ta spera cu den menos di un siman e tambe keda cla cu firma di minister, OK di DOW y tur otro instancia envolvi. Pueblo tambe tin derecho di haya mesun trato, toch?

 

Mas ‘colega’ di Rincon ta deteni y a basha ‘bou. Chichi a bisa caba cu e ta mira habrimento di e refineria di Aruba hopi scur. Di otro forma lo ta un parti chikito di dje so lo bira operacional y si no, ta bay na ordo di dia: desmantelacion. Anto Buchi awo?

 

Merca ta investigando 18 banco na Suisa pa labamento di placa cu ta concerni PDVSA di Venezuela. Chichi ta curioso pa sa si tin figuranan ‘ilustremente notorio’ di nos comunidad riba e lista aki.

 

Chichi no ta mira pakico ta gasta placa pa tene un reunion di PPP ora tur hende sa cu esakinan no ta proyectonan pa nos luga awor aki. Nos no tin wes’i lomba economico pa carganan.

 

Ta parce Chichi cu meneer Karel van Oosterom no ta bon informa riba e PPPnan di Aruba: meneer van Oosterom, weet u wel hoeveel het de bevolking kost om een ‘showcase’ te zijn voor het koninkrijk? Ach, natúúrlijk weet u het wel; maar dat is even niet belangrijk, hè? Meneer van Oosterom, vergeet dit nooit: u stond erbij en keek ernaar...

 

Chichi kier a recorda esnan responsabel pa e maneho di sushi y sushedad na Aruba, pa mustra meneer van Oosterom y otro invitadonan e otro banda GREEN di Aruba, manera por ehempel e dump di Parkietenbos. Chichi kier sa kico nan ta opina di e ‘showcase’ e ora?

 

Chichi ta haya cu pa cambia rumbo di nos pais no mester kere cu ta UN partido so por haci esaki. Tempo a demostra cu TUR partido mester traha hunto pa e pais aki tin un futuro bon. Ta importante pa e ciudadano bira mas consciente di e poder di su voto y e consecuencia di esaki.

 

Mes importante tambe ta pa e hoben wordo mas involucra cu nos ‘staatsinrichting’ tanto na scol como en general. Basta cu labamento di cerebro pa manipula voto di esnan cu no ta debidamente (in)forma. E hoben solamente por ta ‘futuro’ ora cu e ta consciente di kico a pasa y ta pasando den su pais. Asina e por tuma su decision riba futuro di e pais di cual e ta forma parti.

 

Dicon ta ora di controla auto y parti boet so ta mira polis riba caya? Claro, tambe ora sosode un accidente of un atraco of un drive-by-shooting. Pero Chichi ta haya cu si tin mas polis riba caya anto e ora por PREVENI tur e cosnan aki. Ni camara ni mashin por reemplasa autoridad visibel.

 

Den e cuestionamento di maneho di ATA, Chichi kier sa con por ta cu minister Otmar Oduber su firma ta djis un ‘formalidad’, sin ningun peso, ora di duna OK pa un proyecto. Pero si e keda sin firma e ora si e firma ta conta pa motibo cu e proyecto no por bay dor. Straño, no? Chichi no a compronde bon; minister por a splica esaki un biaha mas?

 

Chichi ta pensa di habri negoshi di ‘paraplu’ y ‘regenjas’. Paso cu por spera mas KK spart rond durante e aña aki. Ahhng si... anto ‘gasmasker’ pa evita cu huma ta sigui ciega pueblo... E doofpot ta asina yen cu el a cuminsa bay over... anto ainda falta! Hahaha...

 

Encuanto tur hende ta preocupa cu e atentado terorista na Brussel y e bishita historico di Obama na Cuba, presidente Kim Jong Un di Nort Korea a tira dos misil den Lama di Hapon y a lansa un video unda e ta mustra con nan ta bombardia Washington D.C. si nan wordo provoca. Y na Aruba e atencion ta riba e discusion entre un mandatario y un periodista. Ta bon cu aparentemente e misilnan lo crusa oceano Pacifico...

Please reload