CHICHI ta PUNTR'ABO

21 Maart 2016

Siman cu a pasa Chichi tabata di luto. Un siman unda a recorda con e isla aki a haya su ‘simbolonan patrio’. Pero e mentiranan riba cual algun di nan ta basa nunca a wordo clarifica. Chichi no a mira nada di balor pa celebra.

 

Cua ta e libertad cu nos pais ta gosa di dje? Esun cu tabata y cu te awe tin e poder di ‘verdeel en heers’ (dividi y goberna) ta sigui cu su tactica. Atencion a keda desvia y historia a wordo troci. 

 

E ‘nochi cultural’ tabata un ‘desastre cultural’. Esta un bista mahos, fayonan tecnico, presentadonan di television cu mester bula improvisa cada rato pa yena buraco... ta asina ta promove cultura na Aruba? Ey bo ta mira cu Cultura nunca y te awe no tin balor.

 

E diferente discursonan teni pa varios mandatario y ex-mandatario durante di e acto protocolario dilanti di bestuurskantoor, tabata otro trocemento di berdad cu complicidad di esnan cu ta mira e luga aki sink, ta bati man y sigui duna ‘carte-blanche’ pa caba cu existencia di nos pais.

 

‘E baile aki tin un nomber... Horopo?’. Un pregunta lansa den aire ‘live’ pa un presentado di television n.b.! Unda Educacion General a keda? Mester lesa pa educa bo mes, bishita eventonan cultural en general, no solamente hip hop y carnaval... tin mas cos na mundo... E ta necesario principalmente ora bo ta traha den comunicacion anto bo ta pretende di ‘informa y educa’.

 

No lubida di instala camara di vigilancia na Santana di Cacho. Poco dia pasa Chichi a tende cu un hala di ilegal a drenta atrobe eynan. Polis a core busca nan, pero nada. Ya nan a drenta caba, topa cu esnan cu ta yuda nan haya trabou, vivienda y ta abusa di nan despues. Esaki ta ser yama ‘trata di hende’, of ‘mensenhandel’. Unda e ‘cuerpo special’ cu ta trata esaki a keda?

 

Chichi ta puntra di con Ministerio Publico ta funciona na Corsou y aki na Aruba ta laga di desea? Acaso no ta e mesun leynan ta conta? Ta straño cu cierto denuncianan ta wordo investiga y otro no. Talbes mester investiga Ministerio Publico mes pa wak ta kico ta pasando eynan?

 

Ta berdad cu nos isla ta uno multicultural. Pero ora kier promove INTEGRACION anto mester papia un idioma so: esun di nos, Papiamento. Chichi ta haya cu mester siña e Arubiano ‘nobo’ respet pa nos ‘balornan patrio’ di cual nos IDIOMA ta esun cu mas ta identifica nos, tur dia!

 

Mescos tambe ta conta pa e dunamento di permiso na establecimentonan comercial pa ta habri riba e dia mas importante di nos pais. Chichi no ta mira e necesidad pa supermercadonan ta habri. Ta como sifuera cu e doñonan, cu den su mayoria ta Chines, no ta forma parti di e comunidad. Unda e respet a keda?

 

No por ta asina cu ta multa un persona pa hisa un bandera cu e colo blauw original di 40 aña pasa, pero si ta duna permiso pa establecimentonan habri riba dia di Himno y Bandera, Status Aparte. Ta parce cu e comerciante tambe tin un ‘status aparte’ den e Status Aparte. No por!

 

Encuanto e cuestion di un gobernador nobo pa nos isla, Chichi ta propone pa Buchi bira gobernador. Buchi ta un homber honesto, trahado y sigur e nunca tabata un politico. Un homber di pueblo cu lo sa di busca pa su pueblo wordo respeta y bay dilanti den reino mescos cu e ta haci pa su famia esta ami, Chichi su casa, nos 4 yiunan y nos nietonan.

 

Con a para cu e buscamento di gas y petroleo den nos awanan teritorial? Masha dia Chichi no a mira e meneer cabey blanco na television. Esta meneer Curet cu ta duna un ‘update’ cada tanto tempo. Ademas, Chichi kier sa ta con e bolo aki ta bay wordo parti of a wordo parti caba?

 

Cu si ley di cacho ta importante? Sigur cu si! Mahatma Gandhi a yega di bisa: ‘Grandeza di un nacion y su Progreso Moral por wordo husga pa e manera con e ta trata su animalnan’. Pero esaki no ta aplica pa cacho so sino pa tur animal. Paso cu e ta mustra riba e respet pa otro sernan cu cual nos ta comparti e planeta.

 

Papiando di comparti planeta, saca cabes for di tera, laga politica di avestruz para y mira rond kico ta pasa den mundo. Paso, is(o)la of no, nos ta wordo afecta. Imagina bo si Donald Trump mester gana eleccion na Merca...

 

Y con a para cu e rosamento cerca di un hotel grandi? Hasta e turistanan a keda hororisa pa e falta di ‘progreso moral GREEN’ aki. Unda leynan di Naturalesa y Medio Ambiente a keda? GREEN no ta unicamente molina di biento y panel solar... ta nos flora y fauna tambe!

Please reload